Darimano asa titiak palito
Dibaliak telong nan batali
Darimano asa nenek moyang kito
Dari puncang gunuang Marapi
Ka bukik samo mandaki
Ka lurah samo manurun
Barek samo dipikua
Ringan samo dijinjiang
Sahino samalu
Kaluak paku kacang balimbiang
Tampuruang lenggang lenggangkan
Dibaok nak urang ka Saruaso
Anak dipangku kamanakan dijinjiang
Urang kampuang dipatenggangkan
Jago nagari jan binaso
Mandapek samo balabo
Kahilangan samo marugi
Maukua samo panjang
Mambilai samo laweh
Baragiah samo banyak
Manimbang samo barek
Nan ado samo dimakan
Nan indak samo dicari
Hati gajah samo dilapah
Hati tungau samo dicacah
Parang suku samo dilipek
Parang samun samo dihadok-i
Tibo badunsanak, dunsanak dipatahankan
Tibo bakampaung, kampuang dipatahankan
Tibo banagari, nagari dipatahankan
Tibo babangso, bangso dipatahankan
Adat hiduik tolong manolong
Adat mati janguak manjanguak
Adat lai bari mambari
Adat indak baselang tenggang
Nan kuriak iolah kudi
Nan merah iolah sago
Nan baik iolah budi
Nan indah iolah bahaso
Kuek rumah dek basandi
Rusak sandi rumah binaso
Kuek bangso karano budi
Rusak budi bangso binaso
Koknyo kusuik-kusuik bulu ayam
jo paruah disalasaikan
biduak lalu kiambang batauik
Elok nagari dek Pangulu
Elok tapian dek nan mudo
Nan cadiak candokio
Nan arif bijaksano
Nan tau diduri nan kamancucuak
Nan tau dirantiang nan kamanyangkuik
Tau diangin nan basiru
Tau diombak nan badabua
Tau dikarang nan baungguak
Tau dipasang nan turun naiak
Tau jo ereng nan jo gendeng
Tau jo kieh ujuang kato sampai
Alun takilek alah takalam
Takilek ikan dalam aia
Lah jalen jantan batinonyo
Tau dicupak nan duo
Paham dilimbago nan sapuluah
DIarsipkan di bawah: Uncategorized
