Kuretapi

Maa Rang Lapau nan Basamo,

Soal koretapi ko, bagi ambo iyo agak emosional. Nan mambawo ambo baliak ka Lapau ko tigo minggu nan lalu wakatu komentar ambo ka angku Mantari Sutan tantangan sadiahnyo ambo ditimbuninyo jalan koretapi, diporowaikkan ka Lapau.

Sudah tu, postiang Rangkayo Nismah tantangan perjalanan Group SGA Payokumbuah angkatan kami salasai wisuda 1955 dari Payokumbuah ka Biaro, 30 urang gadih-gadih rancak jo bujang-bujang elok budi, calon- calon Guru umua 19 tahunan, nostalgia nan indak dapek baliau lupokan mangunjuangi rumah amak ambo di Biaro dan rumah kawan kami di Pasia malalui sawah-sawah sapanjang duo kilo di udara sejuk. Sadonyo maimbau kenangan ambo ka maso lalu. Kunjungan group tu marupokan kenangan bagi urang kampuang kami nan alun panah mancaliak anak-anak mudo sabanyak tu segeh-segeh malalui pimatang sawah babarih-barih elok. Urang kampuang impressed, manjadi carito kenangan lamo lamo sasudah tu.

Ambo kenal jo koretapi sajak umua ketek masih Bulando lai, mungkin sajak umua 2 tahun, 1937, acok dibawo ayah ka pasa dari Biaro ka Bukittinggi pulang baliak. Karano rumah amak hanyo sakilo jarak pancaliakan dari jalan koretapi, pemandangan tu marupokan bagian alam ambo sajak ketek. Umua 8 tahun ambo dibawo ayah jo amak jo adiak naiak koretapi ka Padang, malalui Lambah Anai, sudah tu malalui batang- batang badaun rumbio kiri kanan lah talampau Sicincin; taraso parubahan udaro Bukittinggi jo Padang, suatu kenangan tamasya indah nan indak panah ambo lupokan.

Lah gadang, ambo lah panah naiak koretapi ka Sawah Lunto, ka Aceh tu, ka Banduang, ka Purwokerto.  Di Eropah dalam pajalanan 3 bulan,  ambo naiak koretapi balangganan Eurail salamo 2 bulan turun naiak salamaknyo dari Scandinavia sampai ka Switzerland ka Madrid ka Granada, Cordova, Sevilla di Andalusia, Spanyol. Di Malaysia kanyang pulo ambo naiak koretapi kuliliang. Ampek tahun nan lalu ambo mangumbara lo di Myanmar (Birma) naiak koretapi dari Yangoon ka Mandalay (26 jam) sudah tu dari Mandalay ka Mytkinya di ujuang jalan koretapi paliang utara lah dakek ka nagari Cino, di Myanmar (29 jam).
Itulah kenangan pancandu koretapi ko, indak sudah-sudahno.

Baliak ka Amerika, kanyang pulo ambo jo Koretapi nan dimodernisasi manjadi AMTRAK. Trip dari San Jose, CAlifornia sampai ka Seattle, Washington panuah jo pamandangan nan saliang mangatokan indahnyo, dapek dicaliah dari dek koretapi nan pakai restoran pulo, sahari samalam pajalanan. Baitu juo di Kanada jo Meksiko. Sadangkan dakek di tampek tingga kini di Bay Area, sistem koretapi dipermodern lai dengan sistem “bullet” koretapi capek San Jose – San Francisco. Baitu urang gigiahno maintensifkan sistem koretapi ko. Sahinggo kalau ambo ka San Fransisco, acok ambo naiak koretapi, labiah murah dan aman daripado manyetir, karano diateh koretapi ambo dapek mambaco, manyiapkan karajo sabalun ka Sidang Pengadilan, atau mangirim SMS jo HP bolak baliak ka Indonesia atau kama sajo.

Sakitulah dulu sakadar kenangan pancandu bakoretapi. Mudah-mudahan impian Rang Lapau untuak baliakno Koretapi ka Kampuang awak, labiaha moderen dari nan sudah-sudah, dapek manjelma di hari nanti …

Salah satu pantun Rang Dagang nan bairiangan jo bunyi Koretapi ko acok takana di Rantau Urang:

Marakiak Koreta Padang,
Manyauik Koreta Solok.
Marakiak Dagang nak pulang,
Baju lah barek dek panumbok.

Penulis
–MakNgah
–Sjamsir Sjarif

Satu Tanggapan

  1. Ass..
    Iyo bana tu Mak angah. Iyo alah rindu pulo kito naik kereta api tu. Wakatu acara tabuik di piaman patang tu ndak muek-muek di inyoh kereta api doh.
    sakin

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: